من أول أيام عيد الفطر المبارك في بوست متناول ( شكر القائم بالاعمال بالسفارة السودانية بالرياض مهند عجبنا مقطع فيديو مقصوص في جزئيه شكر قناة العربية السعودية ) مع العلم ان الفيديو الكامل اذا فتحتوا ح تلقوا تغطية وصول 10 الف جواز للسفارة ومباشرة القائم بالاعمال لتنزيل الجوازات حتى يستلم المواطن في اول يوم عمل للسفارة .
عندي بعض النقاط واقفه لي في حلقي
اولا : كلنا متفقين بانه اسلوب بعض الموظفين في السفارة غير لائق والمفروض يتحسن في تعاملهم مع الجمهور .
ثانيا : انه ده صميم عملهم وبياخدو عليهو راتب وطبعا بياخدو راتب زي كل مغترب فينا على حسب قانون العمل ( عدد ساعات العمل ) ومازاد عن ذلك ف شكر جزيلا ويستحقو الشكر .
( القائم بالاعمال مهند عجبنا )
هل تعلم بانه القائم بالاعمال مهند عجبنا ( هو اول مسؤل في وزارة الخارجيه يصف ميليشات الدعم السريع بانها متمرده ويصفها بالميليشات في اول ايام الحرب في مؤتمر عربي يضم مجموعة من الدول العربية .
هل تعلم بانه السفارة السودانيه في الرياض او عموما السفارات الخارجية ماحصل شخصيه نزلت في الصالة تحت عشان تشوف الحاصل شنو على المواطن الغلبان .. ومهند عجبنا للناس الجات السفارة بتلقى وسط المواطنين وواقف ومشرف بنفسو على سير العمل وفي الزحمه بتلقى بساعد في المواطنين في الصاله .
ولنقطه ( اللبس ) هل تعلم بانه القائم بالاعمال يوم الوقفه المساء ولدو الصغير شالو بالاسعاف ( كومه سكري ) عمره 9 سنين وابوهو مرافق ليهو في المستشفى وللعلم زوجتو متوفيه قبل 4 سنوات ولدو في غيبوبه في المستشفي وجاء اول يوم العيد من المستشفى للسفارة عشان يتابع سير العمل وتنزيل الجوازات عشان الاحد انا وانت نلقى جوازاتنا جاهزه مع انه غيرو ممكن يقول دي ايام اجازة الموظفين ينزلوها لمن تنتهي الاجازه وقت تاني غيرو الناس تستلم لكن اصر انه ايام العيد تنزل الجوازات .
هل تعلم انه اي مواطن جاء لمهند عندو ظرف خاص لاستلام جوازه بتجاوز كل شي وبقعد يفتش معاك الكراتين الوصلت التجاوز عددها الاف الجوازات عشان ظرفك الخاص ويسلمك جوازك بنفسه .
كلامي ده ماتطبيل دي حقائق حاصله والناس بتشهد على المواقف دي الدخلو السفارة لاجراء وياريت نفرق بين سلوك الموظفين وبين القائم بالاعمال ومافي شخص معصوم من الخطا بس مشكلتنا كسودانيين بنمحي كل شي قدموا اي مسؤل بخطا.
وياريت لو كل دبلوماسي زي مهند عجبنا
بقلم سيد محمد السيد
-
-
-
-
-
-
