الاعلامي ورائد العمل الطوعي محمد ابراهيم يكتب عن شلة المية نفر

الببلك فَقُر (بضم القاف زي ما شايفين)

،،العمل العام والطوعي في السودان تاريخه قديم ومشرف ،، وعدد كبير جدا من المشاريع تم تنفيذها عن طريقه ،، بمنتهى البذل والعطاء والكرم ،، و(التواضع) ،،انا شخصيا علاقتي بالعمل الطوعي بدأت قبل 14 سنة ،، وليهو برجع الفضل بعد الله سبحانه وتعالى في تكوين شخصيتي اليوم ،، بدايتي كانت في جمعية مستشفى سرطان الاطفال 99199 ،، وفيها اتعلمت كتير جدا من الحاجات الساعدت في صقل المهارات واكتساب الخبرات ،، وبناء العلاقات الإنسانية ،،عدد كبير جدا من حملات التوعية نفذناها في البدايات ،، عام 2008-2013 ،، بحضور ومشاركة كافة اطياف المجتمع ،، سياسيين،، رجال دين ،، اعلاميين ،،، فنانين وممثلين وغيرهم ،، ووقتها ما كان في غير فيسبوك شغال، وحتى فيسبوك ما كان فيهو ناس كتار ،، لكن عن طريق التلفونات والرسائل النصية كان كل الناس بتشارك في الحملات دي ،، بدون كلل أو ملل ،، وده استشعار منهم لمسئوليتهم إتجاه المجتمع اللي هم جزء اصيل منه ،، والمجتمع هو العملهم شخصيات عامة ونجوم ،،كنا في الحملات دي نجوب شوارع الخرطوم وامدرمان وبحري،، وزرنا بعض الولايات ،، كنا بنمشي المدارس والجامعات والحدائق والمساجد ،، واي مكان فيه تجمع بشري ،، ودائماً كان بصحبتنا على سبيل المثال لا الحصر ،، الدكتور نصر الدين شلقامي، الأستاذ علي مهدي، الأستاذ عمر احساس ، ومن الشباب رماز ميرغني وافراح عصام وشريفة الفحيل وعقد الجلاد كللللهم ومحمد عثمان ورشا الرشيد وتسابيح خاطر وغيرهم وغيرهم من الشخصيات ،، وكلهم كانوا ملتزمين بدورهم في التوعية ،، وحتى اليوم ما بتأخروا في المشاركة في اي نشاط خيري ،، رغم الظروف وزيادة المسئوليات ،،بعد المقدمة الطويلة دي ،، نجي للبلك فَقُر ،، اصحاب النجومية الزائفة ،، وكلامي الجاي ح يزعل ناس كتار ،، وغالباً اخسر علاقتي بيهم ،، بس الواحد فينا تعب من كم النفاق الاجتماعي الحاصل ده ،، والتمطر حصوو ،،مع تطور العصر وظهور وسائل التواصل الاجتماعي الجديدة ،، وهوس الانفلونسرز والفلورز والتريندات ،، تكونت في السودان تحديداً شلة المية نفر ،، وفي مقولة اخرى شلة الالف نفر ،، الشلة دي هي حالياً المسيطرة على السوشيال ميديا ، وانت امك داعية ليك لو بقيت جزء منها ،، بس المشكلة ان اغلبهم ناس ساي،، وعقولهم فارغة ،، كل همهم البوست عمل كم لايك، والفيديو شافه كم ، والفلورز زادوا كم ،،الشلة دي برنامجها الاساسي انها تطبل لبعض ويعززوا لبعض ويعملوا حاجات مافي زول يستفيد منها غيرهم ،، حفلات وايفنتات وورش ومحاضرات وغيرها من الانشطة البتتشابه في الشكل والمضمون والحضور، باختلاف المكان ،، واسم النشاط ،،طييييييب،، احنا ما عندنا مشكلة مع الحاجة دي طالما ما بتضروا زول، لكن انتوا طرحتوا نفسكم كشخصيات عامة ،، ونجوم مجتمع ،، ودي حاجة عندها تبعات ،، وواجبات ،، ولازم تساعدوا في تغيير المجتمع اللي انتو جزء منه ده للافضل ،، من خلال نشر الوعي بمختلف القضايا اللي بتمسه،، وده شيء طبيعي ،،نجي للطامة الكبرى،،اعتادت الشلة انها تجيها دعوات لمختلف الانشطة والفعالياات ،، سواء مهمة أو غير مهمة،، المهم بالنسبة ليهم زيادة رصيد الدعوات دي ،، وكل يوم لازم تنزل دعوة حضور البتاع الفلاني، أو الهناي العلاني ،، وفي ناس عديل بتقول ليك وين دعوتي،، حتى لو كان الدخول بدون دعوات،، المهم الدعوة تصل وتنزل في السوشيال ميديا ،، وينال عدد من ال( ما شاء الله ،، بالتوفيق،، مكنننننة،، منوووور،، الخ لله) ولحد هنا الموضوع عادي ،، ما هو في النهاية زول عنده هدف ،، ومقدم الدعوة عنده هدف،، انا واحد من الناس بتجيني دعوات للفعاليات كتيرة،، وبكون حريص على الحضور تقديرا لمقدم الدعوة،، أو لاهمية الموضوع ،، ونادرا ما اعتذر ،، وغالبا بعتذر بسبب السفر أو تضارب المواعيد ،، وبالمقابل بقدم الدعوات للفعاليات والانشطة البنظمها ،،نرجع للشلة ،، استجابة الشلة للدعوات البتجيهم بتعتمد على حجم الشو والبرستيج اللي ممكن ياخدوه من المشاركة دي ،، بغض النظر عن أهمية الفعالية ،، قدم دعوة لحضور فعالية في فندق أو صالة أو نادي ،، ح تلقى كل الناس جاية ،، وتتصور وتت(هناي) وتتونس وتمشي ،، حتى لو كان الموضوع طهور كديسة جيران خالتك ،، المهم انت عاملها في حتة كويسة وبرستيج و واااااو كده ،،أما لو -وده سبب كتابة البوست- عامل الفعالية في شارع النيل ،، ومشي من أجل التوعية بسرطان الثدي ،، زي الفعالية بتاعت صدقات امس ،، فكل زول ح يطلع ليك بألف عذر ،، وكلها اعذار واهية جدا ،، إلا من رحم ربي منهم ،، وديل الناس المؤمنين بدورهم في صناعة التغيير في المجتمع ،، ديل الناس الحقيقيين ما تركيب ،، انا محمد، قدمت الدعوة لاكتر من 70 شخص من الشخصيات العامة والانفلونسرز،، لناس كنت فاكرهم كلهم عنده وعي كافي بدورهم إتجاه المجتمع ،، للاسف استجاب للدعوة زي 10% بس وديل انا بشكرهم جدا جدا جدا ،، وسمعت اعذار من نوع:بررررررييييييي ،، مالي بمشي في الحر ده ياااااااخ معقول شارع النيل بالعصر!؟ما لقيتوا توعية غير المشي !؟يا اخوي دي بهدلة ساي مالي بمشي ليهن،، هن بمشن عشانا !؟وغيرها من الاعذار،، ووعدت أصحابها اني ح أكتب في الموضوع ده ،، ف يا جماعة كفاية نفاق،، وكفاية كذب،، وكفاية طلس ،، والناس تبطل تطبيل في الفارغ ،، خليكم حقيقيين ،، 💙