الرحالة امجد خيري يكتب عن رحلته لجنوب افريقيا

كيب تاون – جنوب أفريقيا

اقل ما توصف بة هو المدينة البهجة ❤️

مدينة أوربية التصميم أفريقية الملامح

اول حاجة حا تلفت نظرك الترتيب المعمار الجميل النظافة والاستايل لو سألتهم حا يقولو ليك احنا ما افارقة 🤣🤣🤣

اما البرامج هناك في حدث ولا حرج (ااااااايك) ضمانة حا تنبسطو 😍

البداية

فيزا جنوب أفريقيا من سفارتهم في العمارات

بتنزل طلب الفيزا من موقعهم دا وتملا الطلب وتمشي ع السفارة

ودا الموقع http://www.dirco.gov.za/Khartoum/consularservices.

ما فيها أي تعقيد طلبات عادية جدا وخلال ٣ الي ٧ ايام بتستلم التأشيرة

رسوم التأشيرة لمن سافرنا في اغسطس ٢٠١٨ كانت حاجة رمزية ٤٠٠ج سوداني فقط 😁

نجي لاختيار افضل وقت للسفر

طبعا الشهور عندهم شوية مقلوبة

الصيف في كيب تاون بكون في ديسمبر و ويناير 😂

احنا مشينا في اغسطس الجو كان جميل بالنهار لكن بالليل برد ما بنصحكم اخير الصيف عشان تستمتع بالجد

السفر

الاثيوبية من الخرطوم الي اديس ساعة ونصف

ثم من اديس مباشر الي كيب تاون ٦ ساعات

الحلو هنا نوع الطائرات الي كيب هي بوينغ 777

وفي الغالبية بكون في كراسي كتير فاضية بتديك فرصة تاخد راحتك ( تقريبا في الرحلة دي احنا الوحيدين الكنا سمر احنا والطاقم كل باقي الركاب اوربيين) 🤣

العملة

عملتهم اسمها راند

١ دولار يساوي 17.78 راند قول 18 تقريبا

في ملاحظة مهمة جدا

في كيب تاون في عمولة تغيير عملة يعني ما تحول بالقطاعي حا تخسر قروش كتيرة

افضل مكان بديك سعر كويس هم Western Union

في الواجهة البحرية victoria & Alfred

الاتصال

من المطار اشتري شريحة mtn ب ٥٠ راند معاها ١ قيقا انترنت مجاني وعلى فكرة طلقة ما زي حقتنا في الخرطوم 🤣

السكن

اختيارنا كان وسط المدينة عشان نكون قريبين جدا من المطاعم والمتاجر لكن بعد ما مشيت الشاطي ندمنا على الاختيار لو امكن احجز في كامبوس باي (الشاطي) او Sea point

الفنادق كلها رهيبة وحلوة استايل أوربي وحمام سباحة مطل على البحر مباشرة 💓

متوسط سعر فنادق ٥ نجوم و ٤ نجوم

اليوم ب ٦٠ ال ٧٠ دولار

فندقنا كان هاربور بريدج

1 bedroom suite with full kitchen

سعر الليلة ٦٠ دولار

من الخيارات الحلوة جدا

بريسيدينت هوتيل في ال Sea Point

اليوم ب ٧٠ دولار

او مانديلا هوتيل في وسط المدينة اليوم من ٧٠ الي ٩٠

اما اذا ميزانيتك حلوة ف دلع نفس وانزل في

Taj hotel =200 Usd

The Table Bay Hotel =220 Usd

ديل فخااااامة جد جد ♥️

عموما كل الفنادق مستوى جميل وفي خيارات تبدأ من ٣٠ دولار اليوم منهم
Happy rino hotel – 3 stars

مرفق صور

يلا بسم الله نبدأ البرامج شنو

اول وجهة بيقصدها كل زوار كيب تاون هي table Mountain او جبل الطاولة

منظر خلاااب وجميل جدا من أعلى نقطة في المدينة وفيها ال cable car

ومنها على الواجهة البحرية victoria & Alfred

هنا البهجة والمطاعم والحفلات الموسيقية طول اليوم

في كل ركن و زاوية فرقة موسيقية اجمل من التانية

وكل المطاعم العالمية هنا فالبتالي ما في اي مشكلة في الاكل

بالاضافة الي مركز تسوق ضخم جدا وأسعار حلوة

فيها اكبر اكواريوم ( Tow oceans)

حلو جدا للصغار والكبار كل الكائنات الحية في المحيطين رسم الدخول ١٨٥ راند حوالي ١٢ دولار

وكمان cape wheel

من أعلى نقطة بتشوف الواجهة البحرية كلها وحلوة جدا للتصوير رسم الدخول

١٢٠ راند ٨ دولار

حي بوكاب الشهير جدا و المنازل بالوان جذابة و مبهجة

فيهو برضو فوتوسيشن عجيب 🤣🤣🤣

حديقة كريستين بوش : فيها جسر المشاة فوق مستوى الأشجار انتا كدا شايف الحديقة من مستوى مختلف و جديد تعتبر من أجمل الحدائق في العالم ( مرفق صورة) الدخول مجانا

في الجغرافيا دايما بتقرا راس الرجاء الصالح

يلا الرحلة دي حا توديك عديل ليهو 🤣🤣🤣

الرحلة من امام tow ocean aquarium

الشخص ب ٤٤٠ راند ٢٩ دولار

باصات حلوة جدا و مكيفة وفيها wifi

في الاول بتزورو Robin Island

وفيها شاطي بولدر African penguin

حاجة كدا نص شبر من الوطة لكن متعة

ومنها إلى كيب بوينت حيث التقاء المحيطين والمنظر الرهيب

جمال طبيعة ما عادي والجو خرافي عندهم مطعم راقي جدا بيعمل بيتزا ولا كلمة وفي نفس في قروود اولاد حرام بس يشوفوك داير تاكل يجي يقلعو منك الاكل رجالة 🤣🤣🤣

خلو بالكم

ومنها بننزل تحت الي أقصى نقطة في القارة الأفريقية ولازم الصور لانو دي تجربة مرة واحدة في العمر

الرحلة حلوة وتستاهل كل قرش

بعد ترجع

طوالي احجز لليوم التاني باص City sightseeing

ب ٢٢٠ راند الشخص ١٥ دولار

واستمتع باجمل جولة في كيب تاون في الباصات المفتوحة من فوق لمدة ٤ ساعات ودي شاملة ال كانال كروز والهاربور و جولة على الأقدام وحضور الغروب على قمة signal mounting

اذا معاك كاش حلو خد جولة الهليكوبتر دي مغامرة تانية في حد زاتها

دا موقعهم عندهم عروض جميلة
https://www.citysightseeing.co.za/en/cape-town/all-tours-and-activities

معليش طولنا عليكم في السرد لكن دا والله لسة نص كيب تاون لسة في اكتر واكتر

و زيارتك ل جنوب أفريقيا مستحيل تكون بدون ما تشيل معاك اطعم الفواكة زي العنب الفراولة االانانس

رخيصة بصورة ما طبيعية

كيلو العنب ب ٢٠ راند يعني ٩٥ج سوداني

فاكهة الأناناس ب ١٠ راند يعني ٥٠ ج سوداني

ياخ انا خميت خم لمن المرة بتاعت السوبرماركت اتخلعت
وريتها فرق الاسعار بينا وبينهم

بدهشة سألتني

يعني انتو ما بتاكلو فاكهة كل يوم

طبعا غلبني الرد 🤣🤣🤣🤣

انجوي كيب تاون لأنها حقيقة مدينة بهجة 💓

وبإذن الله راجعين ليها تاني وتالت ❤️